ரம்ஜான் ஐ முன்னிட்டு…..

ரம்ஜான் நெருங்கி கொண்டிருப்பதால் பெங்களூரில் மசூதிகளின் அருகில் “ரம்ஜான் ஸ்பெஷல்” உணவுகள் விற்பனை துவங்கி விட்டது. குறிப்பாக சில வீதிகளில் விற்கும் உணவுகள் மிகவும் சுவையாக இருக்கும். இதில் சிவாஜி நகரின் வீதியும் ஒன்று. சென்ற வாரம், அதையெல்லாம் முயற்சி செய்து பார்க்கலாம் என குடும்ப சகிதமாக கிளம்பி விட்டோம். எப்பொழுதும் போல் மூத்தவர்,” எனக்கு வேலை இருக்கு” என வீட்டில் இருந்து கொண்டதினால், சித்து-வுடன் நானும், பாலாஜி யும் சென்றோம். எப்பொழுதும் சித்து-வை எங்காவது கூட்டி சென்றால், “இங்கேயெல்லாம் எதுக்கு என்னை கூட்டிட்டு வரீங்க” என்பது தான் முதல் கேள்வியாக இருக்கும். பொதுவாக அப்பாவும், பையனும் கூட்டத்தை கண்டாலே அலறுவார்கள். இங்கு கூட்டம் அதிகமாக இருக்கும் என எனக்கு முன்கூட்டியே தெரியுமாதலால் லேசான பயத்துடனேயே அங்கு சென்றேன். முதல் கடையில் மாட்டு இறைச்சியில் “ரோல்” சாப்பிட்டவுடன், இருவர் கண்களிலும் ஒரு பிரகாசம். அதுவரை என் மனதில் இருந்த பயம், பதட்டம் கொஞ்சம் கொஞ்சமாக குறைய ஆரம்பித்தது. அடுத்தடுத்த கடைகளில் மட்டன், சிக்கன் சாப்பிட, “சூப்பர்!! ரெண்டு பெரும் நன்றாக என்ஜாய் பண்றாங்க” என என் மனதில் ஓர் சந்தோசம்.

சிவாஜி நகர் போகும் பொழுது கேமரா இல்லாமல் அங்கு போவதா!!, என கேமரா வையும் எடுத்து கொண்டு தான் சென்றேன். இதோ அங்கு எடுத்த படங்களில் சில.

என்னடா படங்கள் ரொம்ப கம்மியாக இருக்கிறதே என நினைக்கிறீங்களா ?. பின்னே மட்டன், சிக்கன் எல்லாம் கண்முன்னாடி இருக்கும் பொழுது எப்படிங்க போட்டோ எடுக்கிறது :-).  ஏதோ சில படங்களை எடுத்து விட்டு, கடைசியில் சிவாஜி நகரின் புகழ்பெற்ற “லஸ்ஸி” யுடன் அன்றைய நாளை “சிறப்பாக” முடித்துக் கொண்டோம். சித்து ” ஏன் இவ்ளோ சீக்கிரம் வீட்டுக்கு கூட்டிட்டு போறீங்க?” என கேட்கும் போது தான் தெரிந்தது, சாப்பாடு விஷயத்தில புள்ளை, அப்பா மாதிரியே என்று.

மஞ்சள் லில்லி

எனது பட வரிசையில் இருக்கும் பூக்களில், லில்லிகள் அனைத்தும் என் வீட்டில் பூத்தவைகளே (அவைகள் தான்  அதிக பராமரிப்பு தேவைப்படாத செடிகள் 😀 ). இதில் வெள்ளை, இளஞ்சிவப்பு நிறங்களை அடுத்து மஞ்சள் நிற லில்லியையும் சேர்க்க விரும்பி ஏறி இறங்காத நர்சரிகள் இல்லை. கடைசியாக போன வருடம் லால்பாக் ல் அந்த செடி கிடைக்கவே மிகுந்த ஆசையோடு கொண்டு வந்து வீட்டில் வைத்தேன்.
IMG_0821copy1

Pink Lily

IMG_0921copy1

White Lily

IMG_5203copy1

Another Variety in Pink lily

பிரயாணத்தின் போது சிறு பிள்ளைகள், ரயில் எப்பொழுது வரும் என்று முதலிலும், ரயிலில் ஏறி அமர்ந்த பின் ரயில் எப்பொழுது கிளம்பும் எனவும்,  எதிர்பார்ப்பின் உச்சியில் இருப்பதைப்  போல, செடி கிடைக்கும் வரை “எப்பொழுது கிடைக்கும்” என்ற எதிர்பார்ப்பும், அது கிடைத்தவுடன் “எப்பொழுது பூக்கும்” என எதிர்பார்ப்பின் விளிம்பிற்கே கூட்டிச் சென்று விட்டன இந்த மஞ்சள் லில்லி செடி.  இதன்  சிறப்பம்சம் என்னவென்றால்,  மழை பெய்தால் மட்டுமே பூக்கள் பூக்கும் . ஆகவே கிட்டத்தட்ட 6, 7 மாதங்கள் காக்க வைத்து விட்டன. இதற்கு நடுவில் எங்கள் வீட்டு “சேட்டையின் சிகரமான” வெள்ளைப் பூனை கோடையின் சூடு தாங்காமல் குளிர்ச்சிக்காக பூந்தொட்டிகளில் ஓய்வெடுப்பது(சாப்பிட்டு ஓய்வெடுப்பது மட்டுமே அதன் வேலை, அது வேறு விஷயம்) சகஜம்.
IMG_3251copy1

Snowy – சேட்டையின் சிகரம்

இந்த செடி வந்தவுடன், அதில் தான் போய் ஓய்வெடுக்க வேண்டுமா அந்த பூனை!!. என்ன செய்வதென்று தெரியாமல் இருக்கும் சமயத்தில் தான் சிங்கப்பூர் தோழி ஒருவர், தொட்டிகளில் உபயோகப்படுத்தாத tooth brush குத்தி வை என யோசனையை சொன்னாள்(சிங்கப்பூரில் பூனைகள் அதிகம்). அதன் படியே  brush களை செருகி வைத்தாயிற்று. அதை பார்த்த பாலாஜி “பார்த்து,  மஞ்சள் பூக்களுக்கு பதிலா brush வளர போகுது” என சிரிக்காமல் சொன்னவுடன், “எப்படி இப்படி!!! ?” என சிரித்துக் கொண்டேன்.

கடைசியாக, கடந்த சில நாட்களாக வருண பகவானின் தயவினால் 2 பூக்கள் பூத்து விட்டன. அந்த இரண்டு பூக்களையும் “படுத்தி”, சில படங்களையும் எடுத்தாகி விட்டது. இதோ உங்களுடன் அந்த படத்தை பகிர்ந்து கொள்கிறேன்.

IMG_5311copy1

சே…!!! ரெண்டு பூக்களுக்கு இவ்ளோ பெரிய build up ஆ !!!, என்ன பண்ண தோழி ஒருவர், “எங்க வீட்டில் எக்கச்சக்கமாக பூத்து விட்டதே, இன்னுமா உன் வீட்டில் பூக்கலை?”, என்ற கேள்வியில் ஆரம்பித்தது இந்த கட்டுரைக்கான யோசனை. நிறைய நாள் கழித்து என்னை எழுத வைத்ததற்காக, இந்த நேரத்தில கண்டிப்பா அந்த தோழிக்கு நன்றி சொல்லியே ஆகணும் நான்(சூர்யா voice ல் படிக்கவும் )….

மயான கொள்ளை – காவேரிப்பட்டிணம்

2016 வருடத்தின் இரண்டாம் பயணம், காவேரிப்பட்டிணத்திற்கு, மயான கொள்ளை திருவிழாவிற்காக. 2 வாரத்திற்கு முன்பே நண்பர்களுடன் பேசிக் கொண்டபடி மார்ச் மாதம் 8-ம் தேதி காலையில் பெங்களூரில் இருந்து புறப்பட்டோம். ஊர் போய் சேர சரியாக 2 மணி நேரம் எடுத்துக் கொண்டது. திருவிழாவிற்காக வண்டிகளை ஊருக்குள் அனுமதிக்கவில்லை. கோவிலுக்கு சிறிது தொலைவில் வண்டியை நிறுத்தி விட்டு, திருவிழாவிற்காக சாலையின் இருபுறமும் புதிதாக முளைத்திருந்த சிறு சிறு கடைகைகளை ரசித்துக் கொண்டே கோவில் போய் சேர்ந்தோம். இங்கு கிராம தேவதைகளான பூங்காவனத்தம்மன் மற்றும் அங்காளம்மன் ஆகிய இருவரையும் முன்னிறுத்தியே திருவிழா கொண்டாடப்படுகிறது. விழா எடுக்கப்படும் காரணத்தையும் கதையையும் Wiki மற்றும் பல இணைய தளங்களில் ஏற்கனவே அதிகமாக பகிரப்பட்டு விட்டிருக்கின்றன. ஆகவே இப்பதிவில், விழாவில் நான் எடுத்த புகைப்படங்கள், ரசித்தவை,  மனதை உறுத்தியவை ஆகியவற்றை உங்களுடன் பகிர்ந்து கொள்கிறேன்.

திருவிழாவில் முக்கியமாக, மக்கள் தாங்கள் வேண்டிக்கொண்டபடி நேர்த்திக்கடனை அம்மனுக்கு செலுத்துகின்றனர். கன்னத்தில் அலகு குத்துவது, ஆண்களும்  பெண்களும், சிறுவர் சிறுமியரும்,  காளி போன்று வேடமிட்டுக்கொண்டு மயானத்திற்குச் சென்று சில சடங்குகளை செய்து விட்டு வேடங்களை களைவது போன்றவை நேர்த்திக்கடனில் சேர்கிறது.  இதில், அம்மனின் ஆயுதமான சூலாயுதத்தை மக்கள் பல அளவுகளில் கன்னத்தில் குத்திக் கொள்கின்றனர். ஒரு ஜாண் அளவிலிருந்து, 301 அடி வரையிலும் சூலாயுதத்தின் அளவு வேறுபடுகிறது. இதில் என்னை வெகுவாறு பாதித்த விஷயம், சூலாயுத கம்பிகளில் பிடித்திருந்த “துரு”.  கம்பியுடன் இருக்கும் துரு, கன்னத்தில் “செப்டிக் ” ஏற்படுத்தி விடாதா?. இதிலிருந்து மக்கள் தங்களை காத்துக் கொள்ள என்ன மருந்து எடுத்துக் கொள்கிறார்கள் என்பதை அறிந்து கொள்ள ஆவலாக இருந்தது. அடுத்த முறை செல்லும் பொது கண்டிப்பாக அதை அவர்களிடம் கேட்டுக் கொள்ள வேண்டும் என எண்ணிக் கொண்டேன்.

இதோ அங்கு எடுத்த சில படங்கள்.

காளியாக வேடமிட்டுள்ள சிலர்
காளியாக மாறும் முன்...

காளியாக மாறும் முன்…

"மேக்கப் போட்டுக் கொள்ள மாட்டேன்" என்று அழும் குழந்தையை சமாதானப்படுத்தும் தாய்.

“மேக்கப் போட்டுக் கொள்ள மாட்டேன்” என்று அழும் குழந்தையை சமாதானப்படுத்தும் தாய்.

சாமியாடும் பெண்ணை கோழியின் ரத்தத்தைக் கொடுத்து சாந்தியடையச்  செய்கின்றனர்.

சாமியாடும் பெண்ணை கோழியின் ரத்தத்தைக் கொடுத்து சாந்தியடையச் செய்கின்றனர்.

நாக்கில் அலகு குத்திக் கொள்ளும் பொழுது

நாக்கில் அலகு குத்திக் கொள்ளும் பொழுது

சென்னையிலிருந்து பல புகைப்பட நண்பர்கள் அங்கு வந்திருந்ததால் முதல் முறை சென்றிருக்கிறோம் என்ற எண்ணம் துளி கூட இருக்கவில்லை. ஆனால் “மகளிர் தினத்தன்று” , அங்கு, ஒரு பெண் புகைப்படக் கலைஞர் கூட இல்லையே என்ற வருத்தம் இல்லாமல் இல்லை.
மதியம் வரை கோவிலில் நேரத்தை கடத்தி விட்டு ஊருக்கு செல்லலாம் என கிளம்பி வெளியில் வரும் பொழுது தான் தெரிந்தது,  நாங்கள் வரும் பொழுது கூட்டம் சற்று குறைவாக இருந்த தெருக்களை பலவிதமான காளிகள் ஆக்கிரமித்துக் கொண்டிருந்தார்கள். அவர்களின் நீண்ட நெடிய சூலத்திலிருந்து தப்பித்துக் கொண்டு ஒரு வழியாக கோவிலைக் கடந்து வந்தோம்.
தென்பெண்ணையாற்றின் கரையோரத்தில் இருக்கும் மயானத்தில் தான் திருவிழாவின் இன்ன பிற சடங்குகள் நடைபெறும். நேரமின்மை காரணமாக அங்கு செல்லாமலேயே ஊர் திரும்பினோம்.

மார்ச் மாதம் ஆதலினால் என் மகன்களுக்கு முழுப்பரீட்சை ஆரம்பித்து இருந்தது. “நான் காவேரிபட்டினத்திற்கு போய் வரவா? ” என பாலாஜி-யிடம் கேட்கும் பொழுது, “நான் வீட்டிலிருந்தே வேலை பார்க்கிறேன், நீ போயிட்டு வா ” என கூறி, நாள் முழுவதும் குழந்தைகளை பார்த்துக் கொண்டு, சாயங்காலம் களைப்பாக வந்த எங்களுக்கு டீ (வேறு)செய்து கொடுத்தார். இரண்டு வருடங்களாக போய் வர வேண்டும் என நினைத்திருந்த காவேரிப்பட்டிணத்திற்கு சென்று வந்தது மிகுந்த சந்தோஷத்தைக் கொடுத்தது. “என்னுடைய இந்த உதவிகளே, இவ்வருடத்தின் உனக்கான மகளிர் தின பரிசு” எனக் கூறி அந்த சந்தோஷத்தை இரட்டிப்பாக்கினார் பாலாஜி.

தெய்யம் – அண்டலூர் காவு

தெய்யம் – கேரள மாநிலத்தின் மலபார் மற்றும் கண்ணூர் பகுதிகளில் வருடந்தோறும் நடைபெற்று வரும் பண்டிகைகளுள் முக்கியமானது. 2 – 3 வருடங்களாகவே இப்பண்டிகையை படமெடுக்க வேண்டும் என்ற ஆசை மனதில் இருந்து கொண்டே இருந்தது. பாலாஜி -யின் நண்பர் ஒருவரின் சொந்த ஊரில் வருடந்தோறும் இப்பண்டிகை நடப்பதறிந்து ஒன்றரை வருடமாக அவரை படாத பாடு படுத்தி, இம்முறை சென்று, ஆசை தீர படமெடுத்து விட்டு திரும்பினேன்.

இப்பயணத்தில் என்னுடைய அனுபவங்களையும், புகைப்படங்களையும் பார்க்கும் முன் தெய்யம் பற்றி ஒரு சிறிய அறிமுகம். வழக்கமாக இப்பண்டிகை,  கிராமத்து கதைகளையும், கிராமத்து தேவதைகளையும்  உள்ளடக்கியே நடத்தப்படுகிறது. நான் சென்று வந்த “அண்டலுர் காவு” எனும் ஊரில் மட்டும் ராமாயணத்தின் யுத்த காண்டத்தின் ஒரு பகுதியான வாலி-சுக்ரீவன் ஆகிய இருவருக்கும் நடக்கும் போர் மற்றும் ராமன் அயோத்தியிலிருந்து இலங்கைக்கு சென்று சீதையை மீட்கும் படலம் ஆகியவை கதைக்களமாக உள்ளது. மேலும் இப்பண்டிகைகளில் பலவகையான கதாபாத்திரங்களை  ஏற்று அழகான அடர்த்தியான ஒப்பனை செய்து கொள்கின்றவர் அனைவரும் பழங்குடியின மக்கள் அல்லது தாழ்த்தப் பட்ட வகுப்பினைச் சேர்ந்தவர்களே. இம்மாதிரியான பண்டிகை நாட்களில், ஒப்பனை செய்து கொண்ட தெய்யங்களை, அனைத்து தரப்பின மக்களும், கடவுளாகவே நினைத்து அவர்களின் ஆசீர்வாதங்களையும் பெற்றுக் கொள்கின்றனர்.

சுக்ரீவனின் ஆசீர்வாதங்களை பெரும் இளம்பெண்...

சுக்ரீவனின் ஆசீர்வாதங்களை பெரும் இளம்பெண்…

கதை “போர்” அடித்து விட்டதா?… சரி.. நிறுத்தி விட்டேன்.

பயணத்தில்,  நண்பரின் வீட்டுக்கருகில் பண்டிகை நடப்பதினால், அவருடைய வீட்டிலேயே தங்க முடிவெடுத்தோம். பெங்களூரிலிந்து இரவு புறப்பட்டு, காலை கண்விழித்தெழும் போதே “சே” வின் ஆளுயர கட் அவுட் கேரளா வந்துவிட்டதை உறுதி செய்தது. பின்பு நண்பரின் வீட்டில் காலை சாப்பாடு மற்றும் பகல் உணவு ஆகியவற்றை முடித்துக் கொண்டு கோவிலுக்குச் சென்றோம். நண்பகல் “யுத்த காண்டம்” நடந்தேறியது. இப்பண்டிகையை படமெடுக்கும் புகைப்படக் கலைஞர்கள் மத்தியில் சில படங்கள் முக்கியமாக கருதப்படுகின்றது. அதில் அக்கலைஞர்கள் ஒப்பனை செய்து கொள்ளும் பொழுது எடுக்கப்படும் படமும் ஒன்று.  அம்மாதிரியான படங்கள் எல்லாம் எடுக்க வேண்டும் என்று முன்கூட்டியே யோசித்து வைத்திருந்தேன். ஆனால் பெண்களை ஒப்பனை அறையில் அனுமதிப்பதில்லை என்று கூறி என்னை அதிர்ச்சி அடையச் செய்தனர். பின்பு யோசிக்கையில் தான் தெரிந்தது, அம்மாதிரியான படங்களை எல்லாம் எடுத்தது ஆண் புகைப்படக் கலைஞர்களே என. மிகுந்த ஏமாற்றத்துடன் வாலி-சுக்ரீவன் போர் காட்சிகளை படமெடுக்க காத்திருந்தேன்.

வாலி -யை போர்க்களத்திற்கு  அழைத்துக்  கொண்டு வரும் போதே கொஞ்சம் கொஞ்சமாக கூட்டம் சேர்ந்து விட்டது. அவசரம் அவசரமாக, எங்கு நின்றால் நல்ல கோணங்களில் படம் கிடைக்கும் என்றெல்லாம் யோசித்து இடத்தை தேர்வு செய்து கொண்டேன். என் நல்ல நேரம், “செண்டா மேளம்” அடித்துக் கலக்கும் மேளக்காரர்களுக்கு நடுவில் மாட்டிக் கொண்டேன். போர் முடியும் பொழுது என் காதின் நிலைமையை நான் சொல்லித்தான் தெரியவேண்டுமா??

அங்கு எடுத்த புகைப்படங்களில் சிலவற்றைப் பார்ப்போம்.

முதலில் வாலி, சுக்ரீவனை அறிமுகம் செய்து கொள்வோம்.

 வாலி

வாலி

சுக்ரீவன்

சுக்ரீவன்

வாலி-ஐ போர்களத்திற்கு அழைத்து வரும் மக்கள்.

வாலி-ஐ போர்களத்திற்கு அழைத்து வரும் மக்கள்.

 

போர்க்களத்தில் சுக்ரீவனை தேடும் வாலி.

போர்க்களத்தில் சுக்ரீவனை தேடும் வாலி.

 

மலை மேல் வாலியும் தரை மேல் சுக்ரீவனும் போரிடுவதற்கு தயாராக...

மலை மேல் வாலியும் தரையில் சுக்ரீவனும் போரிடுவதற்கு தயாராக…

போர்க்களத்தில் ஆக்ரோஷமான சுக்ரீவன்...

போர்க்களத்தில் ஆக்ரோஷமான சுக்ரீவன்…

கிட்டத்தட்ட ஒன்றரை மணி நேரம் நடந்தது போர். போர் முடிந்த பிறகு தான் தெரிந்தது, கேமரா வை தூக்கிக் கொண்டிருந்ததினால் என் வலது கை மற்றும் முதுகின் ஒரு புறம் முழுக்க வலி கண்டிருந்ததை. பின்பு இரவு ஸ்ரீ ராமனை பார்க்க வரலாம் என வீடு திரும்பினோம்.

இரவு 9 மணிக்கு மேல் கோவிலுக்கு வந்த எங்களுக்கு அங்கு கூடி இருந்த மக்கள் கூட்டத்தை பார்த்தவுடன், கடைசி வரை தெய்யத்தை பார்த்து விட்டு போக முடியுமா என்ற சந்தேகம் வந்துவிட்டது. முழுமையாக பார்க்க முடியாது என்பதை தெரிந்து கொண்டு கோவிலின் முன் மக்களுக்கு ஆசி வழங்கி கொண்டிருந்த ஸ்ரீ ராமனையும், லக்ஷ்மணனையும், பப்புரான் என அழைக்கப்படும் அனுமனையும் படமெடுத்துக் கொண்டு வீடு திரும்பினோம்.
"தெய்வத்தார்" என்றழைக்கப்படும் ஸ்ரீ ராமன்.

“தெய்வத்தார்” என்றழைக்கப்படும் ஸ்ரீ ராமன்.

 

அங்ககாரனான லக்ஷ்மணன்

அங்ககாரனான லக்ஷ்மணன்

 

லக்ஷ்மணனின் தலை மேலிருக்கும் முடி

லக்ஷ்மணனின் தலை மேலிருக்கும் முடி

பப்புரான் என அழைக்கப்படும் அனுமன்

பப்புரான் என அழைக்கப்படும் அனுமன்

ஒவ்வொரு வருடமும் மலையாள கும்ப மாதத்தின் முதல் ஏழு நாட்கள் நடந்தேறும் இவ்வகையான தெய்யம், பலதரப்பட்ட மக்களின் ஒற்றுமையை வளர்க்கும் நோக்கத்திலேயே நடத்தப்படுகிறது.
தமிழ்நாட்டில் நடக்கும் தெருக்கூத்தை  “தெய்யம்” பல இடங்களில் நினைவூட்டினாலும்,  இது ஒரு வித்தியாசமான அனுபவமாகவே இருந்தது.  உடல்சார்ந்த களைப்பு ஒரு பக்கம் இருந்தாலும் நல்ல படங்கள் கிடைத்த சந்தோஷம் அதையெல்லாம் மறக்கச் செய்தன.

சோம்நாத்புரா

கோவிலின் அழகான தோற்றம்

சோம்நாத்பூர், மைசூரிலிருந்து 35 கி.மீ. தொலைவில் அமைந்துள்ளது. பெங்களூரிலிருந்து இரண்டரை மணி நேரத்தில் சென்று விடலாம். இவ்வூர், செழிப்பு வாய்ந்த காவிரி ஆற்றங்கரையில் அமைந்துள்ளது. ஹொய்சளர்களின் திறமை வாய்ந்த கட்டிடக்கலையின் சான்றாக நிற்கும் சில கோவில்களில் இதுவும் ஒன்று.

கோவிலின் முன்தோற்றம்

கோவிலின் முன்தோற்றம்

உள் மண்டபத்திலிருந்து

உள் மண்டபத்திலிருந்து

கோவிலின் அழகான தோற்றம்

கோவிலின் அழகான தோற்றம்

இக்கோவில், ஹொய்சள மன்னர் நரசிம்ஹா III என்பவரின் படைத்தளபதி தண்டநாயக என்பவரால் கி.பி. 1268 இல் கட்டப்பட்டுள்ளது. “schist ” எனப்படும் ஒருவித தகட்டுப்பாறைகளால் கட்டப்பட்ட இக்கோவில், அக்கற்களின் தன்மையினால், மிகவும் அழகான சிற்பங்களுடன், இன்றும் பார்ப்பவர்கள் அனைவரையும் எளிதாக கவர்ந்து விடுகிறது. அணிகலன்களை செதுக்குவதில் புகழ்பெற்ற ருவாரி மலிதாம்பா எனும் சிற்பியின் கைவண்ணத்தில் உருவானதே இக்கோவில். கோவில் முழுவதும் சிற்பியின் கைபடாத இடமே இல்லையென கூறும் அளவிற்கு சிற்பங்கள்!!!. மேலும் சில சிற்பங்களுக்கு கீழ் “மலிதாம்பா” என்ற அவரின் கையெழுத்தையும் காணலாம்.

நரசிம்ஹ அவதாரம்

நரசிம்ஹ அவதாரம்

மத்ஸ்ய அவதாரம்

மத்ஸ்ய அவதாரம்

கோவிலின் உட்புறத்தில் 3 கர்ப்பகிரஹங்களில் முறையே கேசவர், ஜனார்தனர் மற்றும் வேணுகோபாலன் போன்ற மகாவிஷ்ணுவின் அவதாரங்கள் காணப்படுகின்றன. இக்கோவிலில் முதலில் பிரதிருஷ்டை செய்யப்பட்ட மூலவர்கள், அந்நியர்களின் படையெடுப்பினால் சூரையாடப்பட்டதினால் அதற்கு பதிலாக வேறு சிலைகளே இன்று காணப்படுகின்றன. மூன்று கர்ப்பகிரஹங்களுக்கு மூன்று கோபுரங்கள் என்ற விதத்தில் இக்கோவில் ஓர் சிறிய மேடையின் மேல் கட்டப்பட்டுள்ளது. இம்மாதிரியான கட்டிடங்கள் ஹொய்சளர்களுக்கே உரிய பாணி. ஆதலால் கோவில் கட்டிடக்கலையில் அவர்களுடைய பாணியை எளிதாக அடையாளம் கண்டு கொள்ள முடிகிறது.

கோவிலின் அடிப்பாகம் 2 பகுதியாக 6 வார்ப்புகளாக அழகான சிற்பங்களுடன் காட்சியளிக்கின்றன. கீழிருந்து முதல் வார்ப்பில் யானைகளின் அணிவகுப்பும், இரண்டாவதில் குதிரைவீரர்களும், மூன்றாவதில் பசுமையான இலைத்திரள்களும், நான்காவது வார்ப்பில் இராமாயணம், மகாபாரதம் போன்ற புராணங்களில் வரும் காட்சிகளும், ஐந்தாவதில் யாளிகளும், ஆறாவது வார்ப்பில் அழகிய அன்னங்களின் அணிவகுப்பும் கோவில் சுவரை அலங்கரிக்கின்றன. மேலும் கோவிலின் தெற்கு வெளிப்புற சுவர்களின் நான்காவது வார்ப்பில் இராமாயணக் கதைகளும், பின்புற சுவற்றில் கிருஷ்ணரின் கதைகளும், வடப்புறச் சுவற்றில் மகாபாரதக் கதைகளும், சிற்பியின் உளி வழியாக சிற்பங்களாகி கோவிலின் அழகிற்கு மேலும் அழகு சேர்க்கின்றன.

யானைகளும், குதிரைவீரர்களும் முதல் இரண்டு வார்ப்புகளில்

யானைகளும், குதிரைவீரர்களும் முதல் இரண்டு வார்ப்புகளில்

3வது வார்ப்பில் உள்ள இலைகள்

3வது வார்ப்பில் உள்ள இலைகள்

4வது வார்ப்பில் புராணக்கதைகள்

4வது வார்ப்பில் புராணக்கதைகள்

ராமாயணத்திலிருந்து ஓர் காட்சி

ராமாயணத்திலிருந்து ஓர் காட்சி

5 மற்றும் 6வது வார்ப்புகள்

5 மற்றும் 6வது வார்ப்புகள்


6 வார்ப்புகளுடன் கூடிய கோவில் சுவரின் அடிப்பாகம்

6 வார்ப்புகளுடன் கூடிய கோவில் சுவரின் அடிப்பாகம்

Somnathpura

கருடனுடன் விஷ்ணு லக்ஷ்மி

கருடனுடன் விஷ்ணு லக்ஷ்மி

வெளிப்பிரகாரம்

வெளிப்பிரகாரம்

ஹொய்சளர்களின் கட்டிடக்கலைக்கு சான்றாக விளங்கும், பேலூர், ஹளபேடு வரிசையில் சோம்நாத்பூரும் சிறந்து விளங்குகிறது. அடுத்த முறை மைசூர் பயணம் மேற்கொள்ளும் பொழுது தவறாமல் சோம்நாத்பூர் – க்கும் சென்று வரலாமே!!!.

கீழடி – மண்ணுக்குள் மறைந்திருந்த நம் மூதாதையர் கிராமம்

ஒவ்வொரு முறையும் மதுரை செல்வது, ஒன்று அம்மாவை பார்ப்பதற்காக இருக்கும், அல்லது ஏதாவது சொந்தங்களின் திருமணத்திற்கு செல்வதற்காக இருக்கும். ஆனால் இம்முறை “கீழடி” என்னும் இடத்திற்கு செல்வதற்காக மதுரை சென்றோம். கீழடி பற்றி சமீப காலத்தில் நிறைய செய்திகள்,  கிட்டத்தட்ட எல்லா பத்திரிக்கைகளிலும் வந்தாயிற்று. இந்நிலையில், “ஊர்க்குருவிகள்” எனும் பயண அமைப்பு, “கீழடியை நோக்கி..” எனும் பயணத்தை ஏற்பாடு செய்திருந்தது. இதை நண்பர் ஒருவர் மூலமாக அறிந்து நானும், பாலாஜியும் பயணத்தில் கலந்து கொண்டோம். இப்பயணத்தில் எங்களுடன் எங்களுடைய மகன் மதியும் கலந்து கொண்டது கூடுதல் மகிழ்ச்சியை அளித்தது.

கீழடி, மதுரைக்கு அருகில் சிலைமான் மற்றும் திருப்புவனம் ஆகிய கிராமங்களின் இடையில் இருக்கும் மற்றுமொரு சிறிய கிராமம். மத்திய தொல்பொருள் துறையினர் மேற்கொண்டுள்ள ஆராய்ச்சிகளின் பலனாக, மதுரை மண்ணுக்குள் புதைந்து போயிருந்த ரகசியங்கள் வெளிக் கொண்டு வரப்பட்டிருக்கின்றன.  2200 முதல் 2300 வருடங்களுக்குள்  வாழ்ந்த நம் மூதாதையர்களின் கிராமத்தைப் பற்றி தெரிந்து கொள்ளும் ஓர் அரிய வாய்ப்பு தொல்பொருள் துறையினரால் சாத்தியமாயிற்று.

இதுவரை தொல்பொருள் ஆராய்ச்சியாளர்களின் பணிகளை நேரில் கண்டதில்லை. கீழடியை நோக்கி பயணிக்கும் பொழுது, “ஆராய்ச்சிகளை மேற்கொள்ள எவ்வாறு ஓர் இடத்தை தேர்வு செய்கிறார்கள்?”, “எப்படி பொருட்களை சிதைக்காமல் வெளிக் கொண்டு வருகிறார்கள்?” “எம்மாதிரியான வேலையாட்களை வேலைக்கு அமர்த்துகிறார்கள்?” எனும் பல கேள்விகள் என்னுள்.  இதற்கெல்லாம் விடை எங்களுக்காக காத்திருந்தது.

ஓர் பெரிய தென்னந்தோப்பிற்கு நடுவில் இந்த ஆராய்ச்சியை மேற்கொண்டிருந்தனர் தொல்பொருள் ஆய்வினர்.  அங்கு வேலையில் இருந்த தள மேற்பார்வையாளர் ரமேஷ், அனைவரின் கேள்விகளுக்கும் பொறுமையாக பதிலளித்துக் கொண்டிருந்தார்.  முதல் கட்ட ஆய்வாக, ஆற்றுப்படுகைகளை ஒட்டி உள்ள கிராமங்களில் வாழும் மக்களிடையே, தங்கள் கேள்விகளுடன் ஆரம்பித்து, படிப்படியாக, ஏதாவது ஆதாரம் கிடைக்கும் பட்சத்தில், முன்னேறி, சரியான ஓர் இடத்தை தேர்வு செய்கின்றனர்.

தேர்வு செய்த நிலத்தில், ஓர் நாளைக்கு 5 செ. மீ. என்ற அளவில் தினமும் குழியை மிகவும் கவனமாக தோண்டுகின்றனர். இவ்வேலைக்கு, அருகில் இருக்கும் கிராம மக்களில் கட்டிட வேலை பார்ப்பவர்களை தேர்வு செய்து, அவர்களுக்கு சிறிது பயிற்சிகளையும் கொடுத்து ஆரம்பிக்கின்றனர். அப்படி ஆரம்பித்த வேலை, இன்று பல தகவல்களை வெளிக் கொண்டு வந்து கீழடியின் பெயரை பிரபலமாக்கி இருக்கின்றது.

மற்றுமொரு சிறப்பு என்னவென்றால், தமிழ்நாட்டை பொருத்தவரை தொல்பொருள் ஆராய்ச்சியாளர்கள் பழங்காலத்து நாணயங்கள், அணிகலன்கள், முதுமக்கள் தாளி, நடுகற்கள் போன்ற மக்கள் உபயோகப்படுத்திய பொருட்களை மட்டுமே கண்டுபிடித்து வந்துள்ளார்கள். மக்கள் வாழ்ந்த வீடுகள், வீட்டின் சுவர்கள் ஆகியவற்றை கண்டுபிடித்திருப்பது இதுவே முதன்முறை.  மேலும், அங்கு கண்டுபிடிக்கப்பட்டுள்ள உறைகிணறு, நம்மில் சில வருடங்களுக்கு முன்பு வரை உபயோகத்தில் இருந்த உறைகிணறுகளை ஒத்திருக்கின்றன.

_MG_8743copy
_MG_8740copy

கிணறு

வீட்டில் புழங்கிய தண்ணீர் வெளியேறுவதற்கான அமைப்பு.

வீட்டில் புழங்கிய தண்ணீர் வெளியேறுவதற்கான அமைப்பு.

சிதைந்த வீட்டின் ஓர் பகுதி.

சிதைந்த வீட்டின் ஓர் பகுதி.

தானியங்களை சேமித்து வைக்கும் குதிர்

தானியங்களை சேமித்து வைக்கும் குதிர்

ஆய்வு செய்த இடங்களை, கண்கள் விரியும் அளவிற்கு ஆச்சரியத்துடன் பார்த்து முடித்த பிறகு, தள மேற்பார்வையாளர் ரமேஷ், அங்கு அவர்கள் கண்டெடுத்த பொருட்களை, மிகவும் சிரத்தையுடன் எடுத்து காண்பித்தார். ஒவ்வொரு பொருளும் அவ்வளவு அழகு!!!. அதில் அக்காலத்து மக்கள் பயன்படுத்திய பானைகள், அப்பானைகளில் பொறிக்கப்பட்டுள்ள கோட்டோவியங்கள், மற்றும் அதில் தமிழ் பிராம்மி எழுத்துக்களால் எழுதப்பட்ட “திஸன்” எனும் பெயரையும் வைத்து வணிகத்திற்காக மக்கள் வடக்கிலிருந்தும், ரோம் போன்ற நாடுகளிலிருந்தும் வந்திருக்கலாம் என யூகிக்கின்றனர்.  சுட்ட களிமண்ணினால் ஆன அணிகலன்கள், தந்ததினால் ஆன பகடைகள், மற்றும் பெண்கள் தங்கள் காதுகளில் பாம்படம் அணிவதற்காக, காது வளர்க்க உபயோகப்படுத்திய அணிகலன், ஆகிய அனைத்தும் கொள்ளை அழகு!!. விளையாட்டுப் பொருட்கள், அழகிய அணிகலன்கள் ஆகியவை ஓர் இடத்திலும், ஈட்டி போன்ற உலோகத்தினால் ஆன ஆயுதங்கள் மற்றும் மக்களின் பாதுகாப்பிற்கு பயன்படுத்தப்பட்ட பொருட்கள் மற்றோர் இடத்திலும் கண்டு பிடிக்கப்பட்டதினால், அம்மக்களிடையே வர்க்க வேறுபாடுகள் இருந்திருக்கலாம் என்றும் கணிக்கின்றனர்.

இவை அனைத்தையும் பார்த்துக் கொண்டிருக்கும் பொழுது, அருகிலிருக்கும் கிராமத்து குட்டி பயல்களும் எங்களுடன், சத்தம் எதுவுமின்றி, ரமேஷ் சொல்வதை கேட்டுக் கொண்டிருந்தனர். அவர்கள் அனைவரும் அப்பொழுது தான் அங்கு வந்து அனைத்தையும் கேட்டு தெரிந்து கொள்கின்றனர் என நினைத்தேன். ஆனால் அப்புறம் தான் தெரிந்தது ஒவ்வொரு முறையும் அவர்கள் அப்படித் தான் வருகிறார்கள் என்று. பள்ளிகளில் இருக்கும் வரலாற்று ஆசிரியர்கள் எல்லோரும் ரமேஷ் -ஐ போல திறமை வாய்ந்தவர்களாக இருந்தால், அவரைப் போன்று வரலாற்று பாடங்களுக்கு விளக்கமளித்தால், எப்படிப்பட்ட மாணவ மாணவியராலும் வரலாறு, புவியியல் பாடங்களை வெறுக்க முடியாது.

Ring Light ம் கௌதம் m…

ரிங் லைட் செய்து கிட்டத்தட்ட 6 மாதங்களுக்கு பிறகு, சித்தி மகன் கௌதம்-ஐ வைத்து ஒரு Photo Shoot செய்யலாம் என அவர் பெங்களூர் வந்திருக்கும் பொழுது அவரிடம் கேட்கவே, உடனே  சந்தோஷமாக சரி என்றார். கூடவே சித்தப்பா மகன் யோகேஷ் – ம் சேர்ந்து கொண்டார். Ring Light – ல் எனக்கு மிகவும் பிடித்ததே, அதன் மிதமான ஒளியே. அன்று அவர்களை எடுத்த புகைப்படங்களை உங்களுடன் பகிர்ந்து கொள்கிறேன்.

 

இந்தப் படங்களை எடுப்பதற்கு நான் என்னுடைய 6D – யுடன் Canon 100mm f /2.8 L Lens -ஐ உபயோகப்படுத்தி இருக்கிறேன். படங்களைப் பார்த்து “கௌதம் ஹாப்பி அண்ணாச்சி !!”…. உங்களுக்கும் பிடித்திருக்கும் என நினைக்கிறேன்.